呢一兩年間間戲院都大吹立體風，唔少影迷都唔介意畀多幾十蚊睇「激凸」畫面，不過以為咁樣就係極限？非也！ 3D享受已經 out啦，想更強嘅感官刺激，就要試試旺角嘉禾新增嘅 Motion Chair D-BOX！

亞洲第二香港第一
3D影院將平面電影變得更立體，不過始終只能刺激視覺，想感同身受就一定要觸動到分佈全身的觸覺。最近嘉禾院線使咗過百萬，由外國引入 19張越來越流行嘅 Motion Chair D-BOX動感椅，選址嘉禾旺角 2院做試點，成為全港首間擁有 D-BOX嘅戲院，是繼日本後第二個裝置 D-BOX嘅亞洲戲院。


全方位三級 chok
動感椅能夠觸動到全身感官神經，原來是 D-BOX玩法與別不同，因為佢唔只識得震，直情識得 chok，配合畫面內容，郁動程度有如玩過山車咁刺激！ D-BOX設有三個強度給用家選擇，可根據不同人嘅「防 chok」能力而作出調整，用家只要坐上座椅，就會自動啟動 D-BOX，所以唔會見到一排空椅搖動嘅情景。呢一張座椅內置咗活動裝置，經由電腦接收電動指令例如震動或搖動，所以會識得根據畫面內容作出唔同程度嘅搖動效果，包括上下、左右同前後。有咗呢個咁全面嘅搖動範圍，配合一連串嘅體感設計，比起只有震動效果，感覺更全面同立體。


■試播《 The Polar Express》，左右 chok吓 chok吓嘅感覺同身在火車廂一樣。




■人人抗搖能力唔同， D-BOX共有三級程度給用家選擇。


■震動同 chok嘅效果由椅內裝置發動，根據電腦指令執行。


■椅同椅之間的空位更大更闊，點 chok都唔怕撞到前面。


■放飲料位置鬆動過人，感覺非常舒適。

度身訂做體感反應

■每個動作都由程式員編寫，事前要跟導演商討。

至於體感動作設計，當然唔係亂咁嚟！每一套入選 Motion Chair D-BOX編碼庫嘅電影，都會由專業程式員因應電影情節去設計搖動效果嘅編碼，所有體感反應都跟畫面情節直接有關，而且跟畫面內容完全同步，就好似親身 feel到主角嘅感覺一樣。同一般的震動椅唔同，由於 D-BOX嘅所有動作都係經過電影導演親自審批，所以比起以往只有畫面同聲音嘅感受， D-BOX可以幫你更全身投入電影世界。

「體」驗 D-BOX

■爆炸畫面最啱試 D-BOX，由遠至近嘅搖動感覺好逼真。


■以前睇戲只可以聽到跳落去嘅聲音，𠵱家可以親身感受到跌下感覺。


■呢一幕叫船長喺馬車上跳來跳去，座椅真係會盪吓盪吓。

親身試：同主角一齊 chok！
想感受 D-BOX，情況都同 3D電影相似，因為唔係套套戲都支援到。嚟緊暑假大作就有《哈利波特：死神的聖物 2》支援 D-BOX code技術，上映中就有《 S8驚世檔案》同《加勒比海盜：魔盜狂潮》。小記親身試睇過《加》片，見到船長嘅招牌左跌右跌動作， D-BOX會跟住相同方向一齊 chok，唔止大細震動咁簡單，而係一連串動感體感反應令人更加入戲；而不同場景如海盜船、馬車等，亦有相關嘅搖動頻率令人覺得置身其中，難怪 Model都感覺到同主角一齊郁咁款。[節錄...]

戲迷有 Say

Rainbow：「好刺激好 high，睇緊戲直情好似同 Johnny Depp一齊郁。」


黃小姐：「我覺得好刺激，張凳好像真，好震撼！剛才睇撞火車的那幕就好似真的一樣。」

D-BOX出去震
屋企震！

■ D-BOX體感系統$128,000（不連梳化）

其實要感受 D-BOX嘅電影世界，唔一定入戲院，華仁影音就有售 D-BOX體感系統，只要加入組件就可以令梳化椅震動同搖動，家中都可以有影院級享受。不過要睇 D-BOX都要有支援編碼嘅影碟，美國唔少大廠都有加入陣營，現時已有過千套支援 D-BOX編碼嘅影碟推出市面。值得一提的是，除電影外 D-BOX更有遊戲系列，例如《 NEED FOR SPEED: SHIFT》等遊戲都 support得到。

震足 360°！

The Grand Cinema係全球首間「超體感」影院， 12間細院共有過千張震動座椅，仲特別引入「 Infrasonic系統」，當座椅感應到人耳都聽唔到嘅超低音頻（ Infrasound）時，座椅就會產生不同程度嘅震動，而且座椅頭部就會用穿透式氣孔物料，令兩邊、後邊嘅音效同前方一樣，造成 360°環繞音響效果，令電影變得更震撼。

套套震！

想坐動感座椅，在百老匯院線中可選擇到尖沙嘴 The ONE。影院中隔行就設有震動座椅，震動效果會根據不同影片的超低音頻來配合。好處係套套戲都會有呢個效果，只要個 Bass夠重，就可以享受得到動感反應。月尾百老匯更會將震動座椅推至旺角分店，配合即將上映嘅新片《變形金剛：黑月降臨》。

來源:蘋果日報網站

戲飛必定好貴...